Regoli tal-UE dwar il-medjazzjoni

Inkoraġġiment tal-użu tal-medjazzjoni jiffaċilita s-soluzzjoni tat-tilwim u jgħin biex jiġu evitati l-inkwiet, il-ħin u l-ispejjeż assoċjati mal-litigazzjoni fil-qorti, u b'hekk jippermetti liċ-ċittadini jiżguraw id-drittijiet legali tagħhom b'mod effiċjenti.

Id-Direttiva dwar il-Medjazzjoni tapplika għal tilwim transkonfinali fi kwistjonijiet ċivili u kummerċjali. Hija tkopri tilwim fejn tal-inqas waħda mill-partijiet tkun domiċiljata fi Stat Membru li mhux dak ta' kwalunkwe parti oħra dakinhar li jaqblu li jużaw il-medjazzjoni jew dakinhar li l-qorti tordna medjazzjoni.

L-għan prinċipali ta' dan l-istrument ġuridiku huwa li jħeġġeġ lin-nies fl-Istati Membri jirrikorru għall-medjazzjoni.

Għalhekk id-direttiva fiha ħames regoli sustantivi:

• Tobbliga lil kull Stat Membru jinkoraġġixxi t-taħriġ ta' medjaturi u jiżgura l-kwalità għolja tal-medjazzjoni.
• Tagħti lil kull imħallef id-dritt li jistieden lill-partijiet ta' tilwima biex l-ewwel jippruvaw il-medjazzjoni jekk iħoss li jkun xieraq fiċ-ċirkostanzi tal-każ,
• Tipprevedi li ftehimiet li jirriżultaw mill-medjazzjoni jkunu jistgħu jsiru infurzabbli jekk iż-żewġ partijiet jitolbu dan. Dan jista' jinkiseb, pereżempju, b'approvazzjoni mill-qorti jew b'ċertifikazzjoni minn nutar pubbliku.
• Tiżgura li l-medjazzjoni ssir f'atmosfera ta' kunfidenzjalità. Tipprevedi li l-medjatur ma jstax ikun obbligat jixhed fil-qorti dwar xi jkun ġara matul il-medjazzjoni f'tilwim futur bejn il-partijiet ta' dik il-medjazzjoni.
• Tiggarantixxi li l-partijiet ma jkunux se jitilfu l-possibilità li jmorru l-qorti b'riżultat tal-ħin imqatta' fil-medjazzjoni: il-preskrizzjonijiet biex tittella' azzjoni quddiem qorti jiġu sospiżi matul il-medjazzjoni.

Kodiċi ta’ Kondotta Ewropew għall-Medjaturi  (127 Kb)  li jistabbilixxi għadd ta’ prinċipji li medjaturi individwali jistgħu volontarjament jiddeċiedu li jimpenjaw ruħhom għalihom ġie żviluppat minn grupp ta’ partijiet ikkonċernati bl-għajnuna tal-Kummissjoni Ewropea.