X’joffri r-reġistru ta’ insolvenza Rumen?

Proċedimenti ta’ insolvenza fir-Rumanija

Il-Bullettin tal-Proċedimenti ta’ Insolvenza (BPI) ippubblikat mill-Uffiċċju tar-Reġistru tal-Kummerċ Nazzjonali jirreġistra ċitazzjonijiet, komunikazzjonijiet, kopji ta’ konvokazzjonijiet, notifiki ta’ dokumenti proċedurali maħruġa mill-qrati u mill-amministraturi/likwidaturi ġudizzjarji mwettqa fil-kuntest tal-proċedimenti ta’ insolvenza skont il-Liġi Nru. 85/2006 dwar il-proċedimenti ta’ insolvenza.

Il-proċedimenti ta’ insolvenza ġenerali japplikaw għal:

• Kummerċjanti :

1. Kumpaniji kummerċjali;
2. Kumpaniji kooperattivi;
3. Gruppi ta’ interess ekonomiku;

• Organizzazzjonijiet kooperattivi;
• Soċjetajiet agrikoli;
• Persuni legali privati oħrajn li jwettqu attivitajiet ekonomiċi.

Il-proċedimenti ta’ insolvenza semplifikati japplikaw għal:

• Kummerċjanti;

1. Persuni naturali awtorizzati;
2. Intrapriżi individwali u intrapriżi familjari

• Il-kummerċjanti u l-persuni legali kollha li jissodisfaw sensiela ta’ kundizzjonijiet speċifiċi, jiġifieri:

1. Ma jkollhom l-ebda assi patrimonjali;
2. Id-dokumenti tal-inkorporazzjoni jew tal-kontabbiltà ma jistgħux jinstabu;
3. L-amministratur tagħhom ma jistax jinstab;
4. L-uffiċċju rreġistrat tagħhom m’għadux jeżisti jew m’għadux l-istess bħal dak li kien iddikjarat fir-reġistru tal-kummerċ; huma naqsu milli jressqu d-dokumenti meħtieġa bil-liġi;
5. Ġew xolti qabel ma ġiet ifformulata ċ-ċitazzjoni; jew
6. Iddikjaraw intenzjoni li jidħlu f’likwidazzjoni volontarja.

Ir-reġistru kummerċjali/tal-kummerċ ċentrali huwa ġestit mill-Uffiċċju tar-Reġistru tal-Kummerċ Nazzjonali, istituzzjoni pubblika b’personalità legali, li tagħmel parti mill-Ministeru tal-Ġustizzja .

Il-Bullettin tal-Proċedimenti ta’ Insolvenza

X’informazzjoni ssib fih?

Il-Bullettin tal-Proċedimenti ta’ Insolvenza fih l-atti proċedurali kollha maħruġa mill-qrati u mill-amministraturi/mil-likwidaturi ġudizzjarji wara li jingħata bidu għall-proċedimenti ta’ insolvenza, jiġifieri:

• Ċitazzjonijiet, maħruġa minn kontropartijiet f’ċerti sitwazzjonijiet;
• Kontestazzjonijiet;
• It-tieni appelli u talbiet oħrajn;
• Atti proċedurali kkomunikati u deċiżjonijiet tal-qrati;
• Konvokazzjonijiet għal kawżi quddiem il-qrati;
• Notifiki;
• Atti proċedurali oħrajn stipulati mil-liġi (rapporti maħruġa mill-amministratur/mil-likwidatur ġudizzjarju, pjanijiet ta’ riorganizzazzjoni ġudizzjarja, avviżi).

Kif inhu organizzat is-sit elettroniku tal-Bullettin tal-Proċedimenti ta’ Insolvenza?

Is-sit elettroniku tal-Bullettin tal-Proċedimenti ta’ Insolvenza jagħtik aċċess għad-dokumenti, għat-tipi ta’ informazzjoni u għas-servizzi onlajn li ġejjin:

• informazzjoni b’xejn;
• informazzjoni rigward l-istruttura tal-Uffiċċju tar-Reġistru tal-Kummerċ Nazzjonali, id-Direttorat għall-Bullettin dwar il-Proċedimenti tal-Insolvenza;
• leġiżlazzjoni, forom u atti proċedurali speċifiċi.

Il-websajt tal-Bullettin dwar il-Proċedimenti tal-Insolvenza (BPI) tinkludi t-taqsimiet li ġejjin:

• informazzjoni rigward l-istabbiliment tal-BPI:
• atti leġiżlattivi:
• chart tal-organizzazzjoni tal-Uffiċċju tar-Reġistru tal-Kummerċ Nazzjonali, l-uffiċċji tar-reġistri tal-kummerċ marbutin mat-tribunali u l-BPI;
• dizzjunarju legali (insolvenza);
• dejta statistika mill-BPI;
• relazzjonijiet interistituzzjonali;
• informazzjoni ta’ kuntatt.

It-taqsima dwar il-BPI hija mqassma fis-subsezzjonijiet li ġejjin:

1. Servizzi tal-BPI:

• “Bullettin dwar il-Proċedimenti tal-Insolvenza onlajn” (bi ħlas):
• Is-“Sommarju tal-Ħarġa tal-BPI” (informazzjoni mingħajr ħlas);
• Il-“Persuni ppubblikati fil-BPI” (informazzjoni mingħajr ħlas).

2. Provvista lill-BPI:

• Formoli onlajn għall-pubblikazzjoni fil-BPI;
• Formoli offlajn għall-BPI.

2. Formoli ta’ pubblikazzjoni tal-BPI:

• Formoli onlajn biex tingħata informazzjoni tal-BPI;
• Formoli offlajn għall-BPI.

2. dejta statistika.

L-aċċess għar-reġistru ta' insolvenza Rumen huwa mingħajr ħlas?

Il-Bullettin dwar il-Proċedimenti tal-Insolvenza huwa ppubblikat f’format elettroniku. Il-verżjoni elettronika tal-Bullettin tista’ tinstab onlajn fuq:

• il-portal tas-servizzi elettroniċi tal-Uffiċċju tar-Reġistru tal-Kummerċ Nazzjonali Rumen, it-taqsima li fiha l-Bullettin dwar il-Proċedimenti tal-Insolvenza.

L-aċċess għas-servizzi mogħtija mill-BPI huwa diffrenzjat:

• l-utenti jistgħu jidħlu fil-websajt uffiċjali tal-Bullettin dwar il-Proċedimenti tal-Insolvenza mingħajr ħlas u mingħajr ma jirreġistraw;
• l-aċċess għall-portal tas-servizzi elettroniċi tal-Uffiċċju tar-Reġistru tal-Kummerċ Nazzjonali jirrikjedi li wieħed jirreġistra;
• l-aċċess għall-“Bullettin dwar il-Proċedimenti tal-Insolvenza onlajn” jingħata malli wieħed jirreġistra bħala utent u jħallas l-abbonament;
• l-aċċess għas-“sommarju tal-ħarġiet tal-BPI” u l-“Persuni ppubblikati fil-BPI” huwa mingħajr ħlas u jirrikjedi biss li wieħed jirreġistra bħala utent.

Kif tagħmel tiftixa fir-reġistru ta' insolvenza Rumen

Wieħed jista’ jfittex il-“Bullettin dwar il-Proċedimenti tal-Insolvenza onlajn” bin-numru u d-data tal-pubblikazzjoni ta' ħarġa, l-isem tad-debitur, in-numru ta' identifikazzjoni tat-taxxa, in-numru tar-reġistrazzjoni fir-Reġistru tal-Kummerċ, in-numru ta’ referenza tal-kawża fil-qorti, u l-intervall tal-pubblikazzjoni ta’ ħarġa. Ladarba jsir il-ħlas tal-abbonament, huwa possibbli li wieħed ikollu aċċess għall-ħarġiet tal-BPI ppubblikati li jkollhom it-test sħiħ tal-atti proċedurali.

Wieħed jista’ jfittex is-“sommarju tal-ħarġiet tal-BPI” bin-numru u d-data tal-ħarġa. L-informazzjoni li ġejja tista’ tiġi aċċessata mingħajr ħlas:

• It-tip ta’dokument proċedurali ppubblikat fil-Bullettin (eż. ċitazzjonijiet, sentenza biex jingħata bidu għal proċedimenti ta’ insolvenza, notifika biex jingħata bidu għal proċedimenti ta’ insolvenza, konvokazzjoni għal laqgħa tal-kredituri, rapport dwar attività, pjan ta’ riorganizzazzjoni, sentenza biex jingħata bidu għal proċedura ta’ falliment, notifika biex jingħata bidu għal proċedimenti ta’ falliment, pjan ta’ distribuzzjoni, rapport finali, sentenza biex jingħalqu l-proċedimenti ta’ insolvenza, eċċ.);
• Ismijiet il-persuni indirizzati mid-dokumenti tal-proċedimenti;
• Il-kontea ta’ reġistrazzjoni tal-uffiċċju tal-persuni rispettivi;
• Il-kodiċi ta’ identifikazzjoni fiskali;
• In-numru ta’ annotazzjoni tar-reġistrazzjoni fir-reġistru.

Wieħed jista’ jfittex il-“Persuni ppubblikati fil-BPI” bin-numru u d-data tal-pubblikazzjoni ta' ħarġa, l-isem tad-debitur, in-numru ta' identifikazzjoni tat-taxxa, in-numru tar-reġistrazzjoni fir-Reġistru tal-Kummerċ, in-numru ta’ referenza tal-kawża fil-qorti, u l-intervall tal-pubblikazzjoni ta’ ħarġa. L-informazzjoni li ġejja tista’ tiġi aċċessata mingħajr ħlas:

• L-isem;
• Il-kodiċi ta’ identifikazzjoni fiskali;
• In-numru ta’ annotazzjoni tar-reġistrazzjoni tal-persuni indirizzati mid-dokumenti tal-proċedimenti;
• Il-kontea ta’ reġistrazzjoni tal-uffiċċju tal-persuni rispettivi;
• In-numru tal-kawża ta’ insolvenza u isem il-qorti fejn hija rreġistrata l-kawża;
• Il-ħarġiet tal-Bullettin fejn jidhru d-dokumenti proċedurali marbuta mal-persuni rispettivi;
• It-tip ta’ proċedura;
• L-ewwel terminu tas-sentenza stabbilit wara l-bidu tal-proċedura, fejn ikun xieraq.

L-istorja tar-reġistru tal-insolvenza Rumen

Il-Bullettin tal-Proċedimenti ta’ Insolvenza kien stabbilit fl-2006 taħt il-Liġi Nru. 86/2006 dwar il-proċedimenti ta’ insolvenza.

L-għan prinċipali tal-Bullettin dwar il-Proċedimenti tal-Insolvenza Rumen huwa l-ottimizzazzjoni kontinwa tas-sistema elettronika ta’ ċitazzjonijiet, avviżi, sejħiet u notifiki fir-rigward tad-dokumenti proċedurali ppubblikati.

Il-benefiċċji tar-Reġistru ta’ Insolvenza Rumen

Il-pubblikazzjoni tal-Bullettin tal-Proċedimenti ta’ Insolvenza ġġib benefiċċji ċari:

• Tħaffef il-proċedura ta’ insolvenza u tissemplifika t-tqassim taċ-ċitazzjonijiet, tal-konvokazzjonijiet, tan-notifiki u tal-komunikazzjonijiet tad-dokumenti proċedurali mill-qrati tal-ġustizzja u mill-amministraturi/mil-likwidaturi ġudizzjarji, biex b’hekk tkun stabbilita proċedura elettronika għal tali kwistjonijiet.
• Tgħaqqad u tistandardizza d-dokumenti proċedurali maħruġa mill-qrati tal-ġustizzja u mill-amministraturi/mil-likwidaturi ġudizzjarji.
• Tagħti kontribut għall-iżvilupp ta’ bażi tad-dejta nazzjonali ta’ dokumenti proċedurali maħruġa mill-qrati tal-ġustizzja u mill-amministraturi/mil-likwidaturi ġudizzjarji (jiġifieri ċitazzjonijiet, komunikazzjonijiet, sentenzi, konvokazzjonijiet, notifiki, rapporti, pjanijiet ta’ riorganizzazzjoni).
• Tiffaċilita reġistrazzjoni malajr fir-reġistru tal-kummerċ/f’reġistri oħrajn rigward in-notifiki meħtieġa skont il-Liġi Nru. 85/2006 dwar il-proċedimenti ta’ insolvenza.
• Tagħti lill-persuni interessati aċċess għad-dokumenti proċedurali maħruġa mill-qrati tal-ġustizzja u mill-amministraturi/mil-likwidaturi ġudizzjarji.

Links relatati

Is-sit uffiċjali tal-Bullettin dwar l-Insolvenza Rumen;

Is-sit uffiċjali tar-Reġistru tal-Kummerċ Rumen;

Il-portal tas-servizzi elettroniċi tal-Uffiċċju tar-Reġistru tal-Kummerċ Nazzjonali Rumen.