Reġistri dwar il-fallimenti u l-insolvenza

X’joffru r-reġistri ta’ insolvenza Ungeriżi?

Fl-Ungerija, il-qrati tal-kontej (megyei bíróság) u l-Ministeru tal-Ġustizzja u tal-Infurzar tal-Liġi (Igazságügyi és Rendészeti Minisztérium) huma responsabbli biex iżommu aġġornata d-dejta dwar l-insolvenzi.

Reġistru tal-Kummerċ (cégnyilvántartás)

L-informazzjoni dwar il-bidu u t-tmiem ta’ proċedimenti ta’ insolvenza – jiġifieri dwar il-likwidazzjoni jew il-falliment iżda wkoll fuq l-istralċjarju – tkun inkluża fir-Reġistru tal-Kummerċ (Cégnyilvántartás).

Il-forma elettronika ta’ dan ir-reġistru tinżamm mis-Servizz tal-Kumpaniji tal-Ministeru tal-Ġustizzja u tal-Infurzar tal-Liġi (az Igazságügyi és Rendészeti Minisztérium Céginformációs Szolgálata).

Gazzetta tal-Kumpaniji (Cégközlöny)

Mill-1 ta’ Jannar 2008, l-avviżi ta’ likwidazzjoni (felszámolási hirdetmény) bdew jiġu ppubblikati regolarment anki fis-sit elettroniku tal-Gazzetta tal-Kumpaniji (Cégközlöny) (li xi drabi tiġi aġġornata iktar minn darba kuljum).

Fis-sit elettroniku tista’ ssib anki l-ordnijiet (végzés)  li jsiru fir-rigward tal-proċedimenti ta’ falliment.

L-informazzjoni li jkollok aċċess għaliha onlajn mhix legalment vinkolanti.

L-aċċess għar-reġistri ta' insolvenza Ungeriżi huwa mingħajr ħlas?

Iva. Ir-reġistri jinkludu:

• Il-bidu tal-proċedimenti ta’ insolvenza
• Numru ta’ reġistrazzjoni (cégjegyzékszám)
• Isem korporattiv
• Uffiċċju rreġistrat (székhely)
• Il-post fejn jinsab in-negozju (telephely)
• Fergħat (fióktelep)
• Attività prinċipali
• Kapital sottoskritt
• Numru fiskali.

Kif tagħmel tiftixa fir-reġistri ta' insolvenza Ungeriżi

Tista’ tagħmel tiftix fir-Reġistru tal-Kummerċ skont:

• Numru ta’ reġistrazzjoni, jew
• Isem kumpanija, jew
• Numru fiskali

Mill-bidu tal-2008, tista’ tfittex fis-sit elettroniku tal-Gazzetta tal-Kumpaniji anki billi tuża isem il-kumpanija jew in-numru ta’ reġistrazzjoni tagħha. B’hekk tista’ tikseb l-informazzjoni finanzjarja disponibbli kollha dwar kumpanija, inkluż l-istatus ta’ insolvenza tagħha.

L-istorja tar-reġistru tal-insolvenza Ungeriż

Mill-1 ta’ Jannar 2008, l-avviżi ta’ likwidazzjoni bdew jiġu ppubblikati regolarment anki fis-sit elettroniku tal-Gazzetta tal-Kumpaniji (li xi drabi tiġi aġġornata iktar minn darba kuljum).

Minn Lulju 1993, meta s-Sistema Nazzjonali ta’ Informazzjoni dwar il-Kumpaniji u ta’ Reġistrazzjoni tal-Kumpaniji  (Országos Céginformációs és Cégnyilvántartási Rendszer) bdiet taħdem b’mod sħiħ, id-dejta fir-reġistru tal-kummerċ bdiet tinħażen elettronikament mill-qrati.

Tista’ tfittex dejta dwar il-kumpaniji kollha fi kwalunkwe waħda mill-qrati, irrispettivament minn fejn id-dejta tkun effettivament maħżuna.